
Nieħdu l-okkażjoni biex mill-ġdid nirringrazzjaw mill-qalb lil dawk kollha li taw s-sehem tagħhom, kemm fuq ġewwa u anke barra, biex stajna norganizzaw festa sabiħa lil Santa Marija. Nittamaw li kienet festa li għoġbot lill-ommna Marija.
It-Tnejn 26, It-Tlieta 27 u l-Ħamis 29 t’Awwissu ser issir r-reġistrazzjoni tal-katekeżi għas-sena li ġejja, bejn l-4pm u s-6pm fl-Oratorju b’mod fiżiku mhux online, għal kulħadd. Reġistrazzjoni tal-Year 1 u tfal li ser jattendu għall-ewwel darba għandhom jiġu ż-żewġ ġenituri. Mar-reġistrazzjoni ser tintalab donazzjoni ta’ €25 kull familja għall-ispejjeż meħtieġa.
Il-Ħamis 29 t’Awwissu wara l-quddiesa ta’ filgħaxija ssir l-adorazzjoni quddiem Ġesu Ewkaristija.
Il-Ġimgħa 30 t’Awwissu ser issir Adorazzjoni ż-Żebbiegħ fil-5.30pm.
Bejn il-Ġimgħa 30 t’Awwissu sal-Ħadd 1 ta’ Settembru ser isir Live-In għall-abbatini ġewwa Għawdex.
Il-Ġimgħa 6 ta’ Settembru ser isir Pellegrinaġġ għal Għawdex organizzat mill-A.K tan-Nisa. Tluq fis-7.30am, bookings mal-membri tal-azzjoni. Aktar dettalji fil-poster man-noticeboard.
Il-Kongregazzjoni tas-Sorijiet Franġiskani ddeċidew li l-kunvent tal-Imġarr jinbidel minn dar tal-anzjani għal dar ta’ formazzjoni għall-istudenti u n-novizzi. Fil-ġimgħat li ġejjin l-anzjani u l-komunità reliġjuża ser jingħaqdu ma’ komunitajiet oħrajn filwaqt li jiġu minflokhom żgħażagħ li qegħdin jippreparaw biex ikunu membri tal-kongregazzjoni franġiskana. Nirringrazzjaw lill-komunità reliġjuża preżenti tas-sehem u t-talb tagħhom, filwaqt li nawgurawlhom għall-missjoni ġdida li ser jingħataw.
Infakkru li f’Ottubru li ġej jibda l-Kors ta’ Kana fil-Parroċċa tagħna għall-għarajjes li ser jiżżewġu. Fadal 4 postijiet, dawk interessati jikkuntattjawna l-uffiċċju parrokkjali.
Il-Weekend li ġej huwa l-ewwel ħadd tax-xahar għalhekk issir il-ġabra speċjali għall-Parroċċa. Infakkru wkoll fl-iskema tal-benefatturi tax-xahar tas-Sagristija.
Il-ġabra li saret fid-dħul tal-purċissjoni fil-Knisja nhar il-Ħadd li għadda għall-ispejjeż tat-tiswija tal-lanterna, kienet ta’ €1670. Il-ġabra tal-weekend li għadda għall-ispejjeż tal-festa kienet ta’ €2070. Aktar tard nippubblikaw ir-rendikont sħiħ tal-festa. Grazzi tal-għajnuna tagħkom.
Hekk kif ix-xogħol tal-bini tas-Sagristija miexi sewwa, hemm il-bżonn li jsiru l-aperturi ġodda. L-ewwelnett nirringrazzjaw lill-benefattur li ħallas il-bieb il-ġdid li jiswa €4000 u lill-voluntiera li rranġaw it-twieqi li diġa kien hemm in-naħa ta’ isfel. Kif tistgħu taraw fil-board li hemm fejn il-bibien, jonqos jinġabru 10 twieqi ġodda li jiswew €2600 il-waħda. Jekk hawn xi ħadd li jixtieq jisponsorja waħda bħala familja jew kumpanija, jista’ jkellem lil xi ħadd mis-saċerdoti. Nirringrazzjaw mill-ġdid lill-voluntiera kollha li qed jgħinu f’dan il-proġett u grazzi lill-benefatturi kollha tal-għajnuna tagħkom.