Għada/Illum il-Ħadd niċċelebraw il-Festa ta’ Corpus Christi, fl-4.00pm issir Adorazzjoni fis-skiet u fil-5.00pm tiġi ċċelebrata Quddiesa u wara toħroġ Purċissjoni b’Ġesu Ewkaristija bis-sehem tat-tfal li rċivew l-Ewwel Tqarbina, l-fratelli u l-abbatini. Il-Purċissjoni tgħaddi minn Triq: Kurat Chetcuti, Dun Oraz Vella, Vitale, San Pawl, Sir Harry Luke, u lura l-knisja. Ilkoll mħeġġa nattendu.

Illum huwa l-ewwel Ħadd tax-xahar u għalhekk issir il-ġabra speċjali għall-bżonnijiet tal-Parroċċa.

It-Tnejn 3 ta’ Ġunju wara l-Quddiesa jsiru l-provi tal-Kor Parrokkjali.

It-Tlieta 4 ta’ Ġunju fil-5.30pm issir laqgħa għall-abbatini fl-Oratorju.

Il-Ħamis 6 ta’ Ġunju wara l-quddiesa ta’filgħodu jkun hawn adorazzjoni organizzata mill-grupp tal-Ħniena Divina.  Fid-9am issir il-laqgħa tal-A.K tan-nisa fl-Oratorju.

Wara l-Quddiesa ta’ filgħaxija ser issir adorazzjoni li għaliha huma mistiedna b’mod speċjali dawk kollha li huma nvoluti fil-liturġija: ministri tat-tqarbin, letturi, animaturi u membri tal-korijiet.

Il-Ġimgħa 7 ta’ Ġunju Solennità tal-Qalb ta’ Ġesu. Mis-1.30pm l-Knisja tibqa’ miftuħa għall-adorazzjoni sa filgħaxija. Fis-Sagristija hemm karta biex min jixtieq jinkiteb biex ikun hawn xi ħadd kull nofs siegħa fil-Knisja matul il-ġurnata. Fis-7.00pm ikun hawn Quddiesa u wara Purċissjoni b’Ġesu Ewkaristija li tgħaddi minn Triq Dun Edgar, San Pawl, Santa Marija, Fisher u lura l-Knisja. Jieħdu sehem it-tfal tal-Ewwel Tqarbina, l-fratelli u l-abbatini. Inħeġġukom lkoll nieħdu sehem.  L-uffiċċju Parrokkjali dakinhar ma jiftaħx.

Il-Ħadd 9 ta’ Ġunju l-Parroċċa tagħna ser toffri ż-żejt lill-Grotta ta’ San Pawl ir-Rabat. Din hija offerta simbolika li ssir kull sena minn Parroċċi differenti biex jinxtegħel il-lampier tal-Grotta, simbolu tal-fidi tagħna. Iċ-Ċelebrazzjoni u l-Quddiesa tibda fis-5.45pm. Dawk li jixtiequ jingħaqdu mat-trasport tal-Parroċċa għandhom jinkitbu fis-sagristija mhux aktar tard mill-Ħamis li ġej u dakinhar tinġabar donazzjoni ta’ €5 għat-trasport. It-Tluq ikun mill-Pjazza fil-5.15pm. 

Jekk hemm xi ħadd li jixtieq ibierek, jista’ jkellem lil xi ħadd mis-saċerdoti jew iċempel l-Uffiċċju Parrokkjali. Aktar tard matul is-sena f’Ottubru nkomplu bit-tberik tal-familji u d-djar tagħna.                                                                                                                       

Minn Lulju li ġej ser isiru żewġ korsijiet għat-tfal fl-Oratorju: tal-Arkett nhar ta’ tnejn u tal-ħjata nhar ta’ Tlieta. Nhar ta’ Erbgha ser norganizzaw Klabb Sajf mill-5.00pm sas-6.45pm u wara morru ghall-quddiesa ghat-tfal. Dan jinkludi Tisjir, crafts u loghob. Aktar dettalji fuq il-paġna tal-facebook. Il-ġenituri tat-tfal għandhom jiktbuhom għal-liema kors jixtiequ u l-klabb sajf billi jimlew il-formola uffiċċjali tal-Arċidjoċesi fl-Uffiċċju Parrokkjali flimkien mad-donazzjoni, sal-ewwel ġimgħa ta’ Ġunju.    

Infakkru fl-iskema tal-benefatturi tax-xahar b’risq il-proġett tas-Sagristija. Il-Weekend li ġej ser ikun hemm xi helpers fejn il-bibien tal-Knisja għal dawk li jixtiequ jerġgħu jġeddu l-iskema għal sena oħra, peress li skadiet f’Mejju. Nirringrazzjawkom tal-għajnuna tagħkom.

Nirringrazzjaw lil dawk kollha li għenu fl-organizzazjoni tal-Griżma u l-Ewwel Tqarbina. Fi tmiem is-sena kateketika, nieħdu l-opportunità wkoll biex nirringrazzjaw mill-qalb lill-katekisti u lil dawk kollha li jagħtu l-għajnuna fit-tgħalim tat-tfal u l-adoloxxenti tal-Parroċċa tagħna matul is-sena.

Matul din il-ġimgħa għadda għall-ħajja ta’ dejjem Nazzarena Abela. Agħtiha O Mulej…