Il-Ġbir fil-quddies matul dan il-weekend imur għall-bżonnijiet tas-Seminarju tal-Arċisqof. Inżommu lis-seminaristi fit-talb tagħna u nitolbu għal aktar vokazzjonijiet saċerdotali speċjalment minn din il-komunità.

Mit-Tnejn sas-Sibt nitolbu t-talba tal-Via Sagra fis-7.00am.

Bejn it-Tnejn 10 u l-Ġimgħa 14 ta’ Marzu ser isirkors ta’ eżerċizzi għal kulħadd immexxija minn Patri William Bartolo OFM Conv fil-Knisja taż-Żebbiegħ. Fis-6.30pm ikun hemm quddiesa u fis-7.00pm jibdew l-eżerċizzi.

L-Erbgħa 12 ta’ Marzu fit-3.00pm issir il-laqgħa għall-anzjani fl-Oratorju.

Il-Ħamis 13 ta’ Marzu fid-9.00am issir il-laqgħa tal-A.K. tan-nisa fl-Oratorju.

Il-Quddiesa ta’ filgħaxija ssir l-Oratorju mhux fil-Knisja fl-okkażjoni tat-13 tax-xahar. Wara nitolbu t-talba tar-Rużarju quddiem Ġesu Ekwaristija.

Il-Ġimgħa 14 ta’ Marzu filgħodu jsir it-tqarbin tal-morda tat-tieni grupp.

Fis-6.00pm nitolbu t-talba tal-Via Sagra fil-Knisja.

Filgħaxija jibdew l-eżerċizzi għall-adoloxxenti fl-Oratroju mmexxija minn Fr Reuben Gauci u Patri Terence Spiteri OSA.

Il-Ħadd 16 ta’ Marzu waranofsinhar ser isir Hike għall-Abbatini u l-familji tagħhom.

Iż-ŻAK Imġarr qed jorganizzaw Bake Sale ħdejn il-bibien tal-Knisja Parrokkjali b’risq il-ħidma tagħhom maż-Żgħażagħ. Inħeġġukom tgħinuhom.

Il-Kummissjoni Familja qed torganizza nofstanhar seminar tar-Randan għall-familji, koppji u għarajjes nhar l-Erbgħa 19 ta’ Marzu ġewwa s-Seminarju. Id-dettalji jinstabu fuq il-poster u biex wieħed jibbukkja l-post tiegħu irid jew jidħol online u jimla l-google form jew inkella jmur l-Uffiċċju Parrokkjali mhux aktar tard minn nhar l-Erbgħa li ġej.  

Il-Ġabra speċjali tal-weekend li għadda kienet ta’ €1440. Grazzi mill-qalb tal-għajnuna tagħkom.

Ftit informazzjoni dwar iż-żewġ proġetti kbar li għaddejjin bħalissa:

  • Rigward il-Lanterna tal-Koppla, x-xogħol fejn kien hemm ħsarat fuq iċ-ċinta tal-konkos huwa lest, it-twieqi twaħħlu f’posthom, tweħħel sellum ġdid tal-stainless steel fuq barra minflok dak li saddad, u bħalissa qed isir xogħol ta’ invjar, tibjid u dawl ġdid fuq ġewwa. Wara dan ikun jonqos ftit xogħolijiet oħra fuq barra biex il-proġett ikun magħluq.

Filwaqt li kien hemm il-ħidma mill-voluntiera, l-ispiża fuq ix-xogħol tal-bdil taċ-ċinta tal-konkos u affarijiet relatati mal-ġebel ġiet tiswa €19,418.53. Apparti dan hemm spejjeż oħra ta’ materjal li nxtara biex sar ‘il bqija tax-xogħol mill-voluntiera tagħna flimkien ma’ affarijiet oħra li nġiebu mal-proġett tas-Sagristija.

  • Kif innutajtu x-xogħol tal-kostruzzjoni tas-Sagristija l-ġdida huwa lest: tneħħa l-armar, u b’mod volontarju sar it-tikħil kollu tal-faċċata. Issa jrid jitkompla x-xogħol fuq ġewwa biex nattrezzawha u jsiru l-affarijiet neċessarji fuq il-bjut bħat-tikħil u waterproofing. Mill-aspett finanzjarju, in-nofs miljun li nistgħu nissellfu minnu biex jitħallas ix-xogħol tal-bini kważi wasal fit-tmiem tiegħu. Din il-ġimgħa wasal kont ta’ €37,034.81 li jrid jitħallas lil Attard Bros. Dan ifisser li ser ikollna nieħdu ammont sostanzjali mill-flus tal-offerta tal-vara tas-sena l-oħra li jinsabu riservati għal dan l-iskop. Għalhekk infakkru fl-iskema tax-xahar u nappellaw għal aktar benefatturi. Grazzi lil kull min qed jgħin jew inkella jaħdem b’mod volontarju f’dawn il-proġetti.

Il-Kummissjoni tal-Ġimgħa l-Kbira tavża li min jixtieq jieħu sehem fil-purċissjoni tal-Via Crucis bħala reffiegħ jew persunaġġ, inkluż it-tfal, għandu jkellem lill-membri tal-kummissjoni jew lill-Kappillan.

Għada/Illum fl-10.15am ser issir taħdita dwar l-Imġarr fil-Kunsill Lokali.