Xi jrid isir biex l-għarajjes jippreparaw għal żwieġ Nisrani?
L-għarajjes jagħzlu l-knisja li fiha ser jiċċelebraw iż-żwieġ. Imorru l-Parroċċa biex jibbukkjaw il-knisja t-Tnejn li huma.
Sentejn qabel iż-żwieġ, l-għarajjes jgħamlu l-kors tat-tħejjija għaż-żwieġ Nisrani billi jattendu l-kors ta’ Kana. Tkun ħaġa tajba ħafna li jgħażlu saċerdot li jassistihom u jmexxihom fil-preparazzjoni taż-żwieġ. Il-moviment ta’ Kana u diversi parroċċi oħra joffru laqgħa kull xahar għal dawk l-għarajjes li, wara l-kors ta’ tħejjija, jixtiequ jkomplu fil-formazzjoni tagħhom.
Tlett xhur qabel iż-żwieġ, l-għarajjes imorru għand il-Kappillani rispettivi tagħhom (iġifieri ta’ fejn huma residenti) biex isir l-istħarriġ ta’ qabel iż-żwieġ. Magħhom iridu jieħdu ċ-ċertifikati tas-sagrament tal-Magħmudija u tal-Griżma tagħhom kif ukoll iċ-ċertifikat tal-kors tat-tħejjija għaż-żwieġ Nisrani (ta’ Kana). Il-kappillan itihom dokument tal-istħarriġ taż-żwieġ li jkunu jridu jieħdu magħhom meta jmorru l-Kurja.
Tlett xhur qabel iż-żwieġ l-għarajjes imorru flimkien l-Uffiċċju tar-Reġistru Pubbliku (Triq Aldo Moro, Marsa) biex isiru t-tnidijiet ċivili taż-żwieġ. Magħhom iridu jieħdu l-karta tal-identita u photocopy tal-karta tal-identita tax-xhieda. Qabel ma jmorru irid isir appuntament billi jċemplu fuq 2590 4200 (jew 2215 6383 għall-uffiċċju ta’ Għawdex).
Kif ilestu l-istħarriġ ta’ qabel iż-żwieġ l-għarajjes imorru l-Uffiċċju Żwiġijiet tal-Kurja, Floriana (entratura minn quddiem il-kwartieri tal-Puliżija) biex joħorġu t-tnidijiet tal-Knisja. Magħhom iridu jieħdu id-dokumenti tal-istħarriġ taż-żwieġ li jkunu tawhom il-Kappillani. Jistgħu iċemplu mit-Tnejn sal-Ġimgħa bejn il-11am u nofsinhar għal appuntament billi jċemplu fuq 25906205.
Mill-Kurja jingħataw karta u l-għarajjes imorru biha għand il-kappillani tagħhom (iġifieri kull wieħed imur għand il-kappillan ta’ fejn joqgħod), biex fin-notice board tal-parroċċi tagħhom joħorġu t-tnidijiet ta’ żwieġ għal żewġ weekends konsekuttivi. Wara li jgħaddu ż-żewġ weekends jerġgħu jmorru għand il-Kappillani tagħhom biex jiffirmalhom din il-karta.
Flimkien mas-saċerdot li ser jiċċelebra l-quddiesa, l-għarajjes jgħażlu l-qari tal-quddiesa u t-talba tal-ġemgħa, u jaraw ir-rit taż-żwieġ u l-barka fuq l-għarajjes. Jgħaddu wkoll kopja tal-qari lil dawk li ser jaqraw waqt il-quddiesa biex ikunu ppreparati.
Importanti li l-għarajjes iħejju ruħhom spiritwalment bit-talb flimkien, u qabel ma jiżżewġu jsibu ħin biex jersqu lejn is-Sagrament tar-Rikonċiljazzjoni u Maħfra.
Kull aspett taċ-ċelebrazzjoni, inkluż il-kant u l-mużika ta’ waqt il-quddiesa, għandom ikunu addattati għal funżjoni liturġika. Qabel ma l-għarajjes jiddeċiedu fuqhom aħjar, jiddisku mal-Kappillan/Rettur tal-knisja fejn ser jkun iċċelebrat iż-żwieġ. Bħal dejjem, l-ilbies irid ikun addattat għad-dar ta’ Alla. Ara r-regoli tal-Knisja Parrokkjali aktar ‘il fuq.
Hija ħaġa sabieħa li l-għarajjes jaqsmu dal-ferħ tagħhom ma’ min hu fil-bżonn.
